ELI- Identificador de Lexislación Europeo
O ordenamento xurídico español é unha realidade complexa e plural, integrada por normas que corresponden a distintos niveis territoriais (estatal, autonómico e local). Porén, malia que esas normas constitúen un sistema e que se relacionan e enlazan entre elas, a nivel interno prodúcense diferenzas nos sistemas técnicos utilizados para almacenar e presentar a lexislación nas respectivas páxinas web, o que dificulta o acceso dos profesionais do dereito, das empresas e dos cidadáns en xeral, e complica que os sistemas de información lexislativa poidan interoperar entre eles.
Por iso, a implementación do ELI en España resulta especialmente aconsellable xa que, ademais dos beneficios que proporciona a escala europea, no ámbito interno se obterá unha notable mellora no acceso á información xurídica e na interoperabilidade dos sistemas de información legal das distintas administracións.
A pluralidade do ordenamento español fixo necesario que a implementación do identificador se realice de forma coordinada por todas as administracións, de acordo coa filosofía marcada polo Esquema nacional de interoperabilidade, o cal ten presentes as recomendacións da Unión Europea.
Por iso, a Comisión Sectorial de Administración Electrónica, que é o órgano técnico para a cooperación da Administración xeral do Estado, das administracións das comunidades autónomas e das entidades que integran a Administración local en materia de Administración electrónica, decidiu crear no ano 2017 un Grupo de traballo ELI para estudar a forma de aplicar este estándar á lexislación española.
A partir do traballo realizado por este grupo, a Comisión Sectorial de Administración Electrónica aprobou, na súa reunión do 13 de marzo de 2018, a Especificación técnica para a implementación do identificador europeo de lexislación en España (fase1).
Esta especificación ten como obxectivo establecer as directrices comúns que require a implementación do ELI no contexto español, de maneira que a identificación e descrición dos recursos legais se realice de maneira coordinada e coherente por parte distintas administracións.
De acordo co enfoque gradual que caracteriza o ELI, e que seguiron o resto de países europeos, optouse por que a implementación en España se realice en varias fases: na primeira fase, o ELI aplicarase unicamente á normativa do Estado e das comunidades autónomas. A complexidade da normativa local e a variable situación tecnolóxica dos boletíns oficiais da provincia e das corporacións locais aconsellan abordar a implementación do identificador á normativa local nun segundo momento.
O calendario estimado para esta primeira fase de implementación do identificador é o seguinte:
A especificación define o ámbito normativo ao cal atribuír ELI e o modelo URI para a normativa estatal e autonómica (piar 1), así como un conxunto de metadatos mínimos comúns (piar 2).
Tendo en conta que a maior parte da normativa vixente foi ditada con posterioridade á Constitución e que os primeiros estatutos de autonomía se aprobaron en 1979, o ELI aplicarase, polo menos, á lexislación estatal e autonómica publicada a partir do 29 de decembro de 1978. No ámbito estatal tamén se aplicará a todas aquelas normas publicadas con anterioridade e que conten con versión consolidada.
Conforme a “especificación técnica” aprobada pola Comisión Sectorial de Administración Electrónica, a estrutura da URI para as normas estatais e autonómicas será a seguinte:
/eli/{jurisdiction}/{type}/{year}/{month}/{day}/{number}/{version}/{version_date}/{language}/{format}
| Compoñentes da URI | ||||
|---|---|---|---|---|
| Campo (ELI) | Descrición | Formato | Valores | Comentarios |
| jurisdiction | Xurisdición | Lista limitada de valores alfabéticos | Táboa de vocabulario controlado | ISO 3166 alfa 2: ISO 3166-1 para o Estado. ISO 3166-2 para as CC.AA. |
| type | Rango da norma | Lista limitada de valores alfabéticos (de 1 a 4 letras) | Táboa de vocabulario controlado | Os rangos identificaranse mediante siglas, de lonxitude variable |
| year | Ano de disposición | Valores numéricos Formato AAAA | 2001, 2002 … | Data de sinatura (yyyy/ mm/dd) |
| month | Mes de disposición | Valores numéricos Formato MM | 01, 02 … | |
| day | Día de disposición | Valores numéricos Formato DD | 01, 02 … | |
| number (natural identifier) |
Alfanumérico | Valores numéricos, en ocasións alfanu- méricos | Con carácter xeral, o número correspóndese co n.º oficial | |
| version | Identifica se o recurso legal é o inicial, o consolidado ou o corrixido | Lista limitada de valores alfabéticos (3 letras) | Táboa de vocabulario controlado | |
| version_date (point in time) |
Indica a data de actualización que corresponde ao texto consolidado | Valores numéricos. Formato: AAAAMMDD | Só para recursos consolidados | |
| language | Idioma da disposición | Lista limitada de valores alfabéticos | Táboa de vocabulario controlado | ISO 639-3 (código de 3 letras), cunha adaptación para o valenciano e para os textos bilingües |
| format | Formato de publicación | Lista limitada de valores | html, pdf, epub, xml | Os valores dos formatos débense axustar ás tipoloxías establecidas por IANA |
A implantación do modelo URI en España exixe que se normalicen os metadatos que utilizan as distintas administracións para describiren a lexislación, polo menos aqueles que conteñen a información dos compoñentes da URI.
Por iso, na primeira fase de implementación do ELI en España, o piar 1 abórdase conxuntamente co piar 2, co obxecto de establecer unha relación de metadatos mínimos comúns que faciliten a interoperabilidade da información lexislativa.
A especificación técnica prevé os seguintes metadatos mínimos comúns: